麻雀樂團｜林溥來演「變態殺人狂」壓力極大兼要催眠自己 眼定定+唔眨眼營造變態忘我感
.
《麻雀樂團》昨晚（8月21日）一集，「變態殺人狂」楊堅（林溥來飾）終於向阿鐵（李佳芯Ali飾）伸出魔爪，導火線竟然是因為阿久（譚俊彥Shaun飾）的一句「衰婆」！事緣楊堅登門為久哥檢查鋼琴時，因聽到阿久與阿鐵傾電話時大大聲鬧了一句「八婆／衰婆」，因而「獸性大發」，以陰森tone鬧爆久哥「蝦女人嘅男人全部都係賤人」，還將毒品放入久哥衫袋中予以嫁禍；而為「保護」阿鐵，楊堅在雨夜中綁走她帶回家，邊興奮地告訴阿鐵自己如何殺死前度的同時、邊逼阿鐵硬食自己烹煮的意粉…
一出場已吸獲不少關注的林溥來Patrick Sir，本周的「變態放題」更令人眼前一亮。除獲劇組刻意拍攝多個有Feel到極的陰森表情Close up，拿起Ali飲過的水杯「隔空錫錫」、鬼上身般鬧爆阿Shuan賤人、「雨夜屠夫」造型＋病態笑容向Ali打招呼、情緒大暴走狂質Ali食意粉，及透過汽車倒後鏡向Shaun挑機等，都釋放出一定程度的恐怖感及張力，成結局周前劇集MVP！對於Patrick Sir「難得變態」，網民極為受落，大讚他入型入格兼有「雨夜屠夫」Feel。網民：「原來你可以咁恐怖」、「要報東張呢單嘢」、「你係咪做緊自己？（咁講都係想讚你演得好）」。
談到劇中陰森表情+眼神到位，Patrick Sir接受官方訪問時笑言自己事前有為角色設計「望人唔眨眼」狀態：「我拍之前就定位咗個角色係隱藏性變態，所以我就設計咗佢望人會望得好深入、望到好似要睇穿晒對方咁，同埋眨眼次數會偏少。」對於在劇中要連番糟質Ali，Patrick Sir坦言壓力很大，感激Ali交足戲幫助他入戲之餘，又透露拍攝時有催眠自己要當Ali是「心愛的玩具」幫助入戲：「Ali好幫到我，譬如我對佢做變態嘢，佢做到好驚嘅反應，咁樣會令我更易入戲。同埋為咗更忘我，我有催眠自己要當Ali係玩具咁過份溺愛。」
Patrick Sir續指昨晚與Shaun的打鬥戲，嘴角流出的是真血，足證兩位演員拍攝時相當投入：「嗰吓因為個位錯咗，所以真係爆缸，阿Shaun都好驚猛話唔好意思。開頭以為要聯針，好彩去到醫院醫生話唔太深，可以唔使聯，但笪𤶸都成年先褪咗。」Patrick還一再大讚阿Shaun勁專業又照顧同劇演員：「佢好熟悉製作，知道鏡頭前後要點樣配合去做效果。好似今晚（第20集）嗰場麻雀館打交戲，因為又爆枱又跌嚟跌去咁，佢就教我點發力同借力可以唔使受傷，仲教埋我邊啲位要落Pat保護自己，真係好多謝佢。」Patrick Sir最後還不忘感激編劇及導演團隊：「簡單幾個場口同鏡頭，已經帶出到想要嘅效果，真係好犀利。」
本集另一MVP是譚俊彥，昨晚他追著Patrick Sir喪跑一幕相當impressive，在鏡頭前一味喪跑足足十分鐘之餘，還要緊接飛撲及埋身肉搏鏡頭，少啲體力都唔掂！但45歲的阿Shaun不但全程動作流暢自然，而且更跑得相當之快！據知，為了這場戲，阿Shaun在大熱天時跑足大半日，但驚人的是，無論重跑幾多次，阿Shaun還能Keep住驚人步速，獲劇組笑封「最佳男飛人」！監製羅永賢Marco亦大讚阿Shaun Keep得好：「阿Shaun有跑開馬拉松，不嬲體能都好好；而且佢仲要好專業，之前拍《拳王》幾場戲，佢都會操到自己好弗，所以佢嘅體能完全係不容置疑。」
