【登上世界屋脊自駕遊】
講起自駕遊，香港人就好興揸車北上消費，原因係食買玩都平過香港。同樣都係自駕遊，林寶堅尼搞咗個登上世界屋脊自駕遊畀Urus SE車主參與，喺6月17日從拉薩出發，深入青藏高原，挑戰珠峰大本營近域嘅高海拔路段。
呢個四日Urus SE行程大約1200公里，沿住G349、G219同G318國道，穿過羊卓雍措湖、卡若拉冰川同江孜古堡，喺海拔5000米嘅珠峰區域遊走，係激情駕駛而唔係食買玩。
廠方搞個咁特別嘅自駕遊，梗係想展現呢款插電式混能超級SUV嘅性能啦。不過睇咗現場嘅相片，真係會令人心思思想去世界屋脊自駕遊呀！
