艺人专访丨張馳豪踏入30歲被兄弟逼搞壽宴 冼靖峰林智樂望「聲夢」拍旅遊節目
張馳豪（Aska）、冼靖峰（Archie）和林智樂（Felix）回顧龍年做了多個新嘗試，兼得到獎項，過得相當充實。展望蛇年，他們除了想歌影視都有不同機會外，3人都希望「聲夢1」能齊齊拍遊遊節目，仲度好晒形式想向公司建議，而3月5日滿30歲的Aska，竟被2位兄弟瘋狂逼他大搞生日會，相當搞笑！
Felix 新一年目標除了多做歌外，還想參加更多音樂綜藝，因獲益良多，「參加《聲生不息·大灣區季》令我識多咗好多前輩，我好想識更多呢個行業嘅人，想有多啲交流，我會吸收得最快。」Archie 去年有不少作品推出，今年他就希望集中火力創作歌曲，「踏出第1步係最難，其實我1年前已經想做，但總覺得唔會作到啲好嘅嘢，一路唔實行，後尾諗通咗作第1、2首未必好好，但作到100首質量點都會慢慢變好，所以唔好諗作咗出嚟先啦！」
Archie和Felix異口同聲，希望今年《聲夢》有機會一齊拍節目，Aska提議開個遊遊節目，「叫《聲夢旅行團》或者《聲夢環遊世界100日》。」Felix甚至認為應該做首個長壽旅遊節目，「可以拍足1年，每個星期去唔同地方，大家好似跟團咁邊個得閒就報名，邊個有嘢做就返香港先。」他還認為可參考外國節目，「個音樂節目好得意，一班歌手去旅行，去到某個地方就搞個騷，我哋都可以咁喎！」Archie主動請纓寫計劃書，「由Aska負責交上去，我哋15個去晒搵高層請求。」
Aska今年最希望有機會拍電影，原因同爸爸有關，「除咗好奇拍電影係點，仲因為我爸爸好鍾意睇戲，仲會入戲院食住爆谷睇，如果畀佢喺戲院見到我應該好正。」下月滿30歲的他，仲想這段日子再努力點，「趁住身體仲頂得住，就要衝多啲。」Archie和Felix勁興奮建議他要大搞生日會，Felix更要叫齊「聲夢」兄弟姐妹出席，「30大壽一定要搞，仲要好盛大。」Archie仲諗好生日禮物，「我想送原條吞拿魚畀你，搵埋師傅即場劏，夠畀晒全場人食。」見兩兄弟盛意拳拳，Aska無奈話：「我考慮吓啦！如果你搞到條吞拿魚返嚟話你叻！」
