入行逾40年的视帝欧阳震华（Bobby）于疫情期间休息两年，经沉淀后决定「还能工作嘅日子，睇吓有啲乜可以触碰神经，勾起团火」，结果在太太友人的帮忙下，动笔签约英皇，努力搣甩「电视味」，锐意转赛道改向影坛发展。多年来做当主角，Bobby却谦称：「我依家系新人，千祈唔好叫我做主线，暂时没信心呀！」

他又打趣如今已过60岁，能够签约大公司相当感恩，且目前「已经有啲嘢安排同沟通紧」。回顾过去的演艺生涯，Bobby坦言：「拍咗咁多年电视剧，好多角色都好相近，系未演过奸角囉，名气有但唔得丰富囉，内里一直喺度消耗紧，其他嘢发掘唔到出嚟。当时话演反派，边个敢搵我试啫？」

今次倾约到最后阶段，Bobby考虑了两小时便有所决定：「我打畀负责人话不如签约啦，十足好似求婚一样，哈哈！」

作为「影坛新人」，其实早于90年代时，Bobby已曾试过进军影圈：「拍过啲暴力三J片，都有人除衫嘅，不过唔系我囉，合约写明点都要有条孖烟囱，免『擦枪走火』呀，哈哈！（当时觉得事业发展不如意？）坦白讲，唔系吴启华、黄日华同吴镇宇佢哋离开电视圈，我哋呢啲真系Kick住咗喺度冇得上（位），《壹号皇庭》之前，我仲谂住完咗呢张约就去卖衫㗎喇，真系绝处逢生，行路执到钱呀。」

乐天知命的Bobby更自曝以往不时被误将冯京作马凉：「喺街度有人当咗我系刘青云同石修，最搞笑系有次我喺马来西亚飞返香港，隔篱坐住个剧迷话好锺意睇我演戏，大家倾咗一轮到落机，佢竟然话：『好高兴认识你，戴志伟！』（你唔澄清？）算啦，再讲落去唔通撼到埋机舱咩？」

亦犹如当初与「富三代」太太傅洁娴拍拖，引来不少闲言闲语，最终他亦及时做好心理调节，庆幸未有放弃一段大好姻缘。

谈到结婚28年，Bobby罕有放闪：「当初大家有啲『心灵感应』，我唔敢拖（手）呀，亦知道佢屋企起初唔接受我，好彩佢好主动及勇敢，同屋企人讲清楚，后来直情系外母开口，提议我哋去加拿大注册。外母挑通眼眉，帮埋我开口呀，直到依家我老婆从来冇大声同我讲过一句嘢，反而我试过发忟，喺屋企掟烂咗个电视遥控器，佢处变不惊咁同我讲，订一个返来起码要两星期，你要行嚟行去揿电视，系咪搵自己笨呢？咁讲我仲唔收手呀？」